代理為開單 底褲濕哂的日子



中原地產在西半山瀚然袋佣大勝九條街,唔係中原個team嘅我,一邊葡萄,還希望外人唔好以為做代理真係咁好搵,你沒有看到我們帶客睇樓,睇到底褲都濕哂,最終食白果嘅日子。

當初入行,唔講粗口嘅經紀阿頭已經贈我地七字真言「好天斬埋落雨柴」,聽師兄講,佢講多咗一句:「做豪宅區,有時好似中六合彩」,點解佢講呢番說話?因為,入行半年,廿歲都未夠嘅阿然,有日坐係分行看門口,有個操內地口音、著住件白衫汗衫嘅阿叔,walkin買樓,跟住一個月,真是買咗件「紅頂」。者係淺水灣豪宅區,個頂紅色嘅屋仔,成交價超過1億元,收佣兩球,阿然自己袋60萬元。

阿然被屈請成team十零人去唱k,其實佢唔介意,佢第二日仲走去買咗隻勞力士「地通拿」。恨?邊個唔恨,佢隻撈,成為我嘅原動力。

有一日,我係分行一邊cold call,一邊轉珠,一個身光頸領嘅阿嬸入來,濃濃嘅上海口音,心諗,我是第二個阿然?開心,開心嘅係,阿嬸真是內地客,相信好有米。之後睇咗十幾次樓,三十幾度,陪佢走上走落。佢講到明,我咁辛苦,唔會幫襯第二個。呢句話,就算是商場術語,我都好開心。

個段時間,忙到女友幾乎要哂心口,誘惑我陪佢去老尖走一走,但結果我真係無陪佢,走去陪阿嬸睇樓,因為我半年都未開過一張單。阿嬸要求唔算奄尖,想用2000萬買個海景樓,最終,被我跪求到xx門18樓x室嘅業主放盤。長途電話幾貴,我都制,打去報俾上海大嬸:「阿姨,我給你找了一個單位,18樓的,廣東話,十八,實發,你買了,一定會發。」她聽了,的確很開心,還說一個禮拜後來香港簽約。阿媽,我得咗啦!

記得那段時間,我每日一問,擔心嘛,怕佢甩底,事隔三日,上海大嬸突然打給我,相信你都估到佢想講乜,而我經已哭了,但你估唔到原因,佢話:「我老公罵我,他說你怎會買18樓,你想我去十八層地獄嗎!」本著阿頭教,死咬唔放的經紀心法,我話咁我同你搵過第二間呀?點知,佢話佢內地收緊銀根,佢老公家唔想買樓,打發咗我。

一個月、30日、720個鐘,我只係想跑一張單啫,但結果乜都無。代理袋佣幾百萬嘅事,如同你永遠只看到比賽的第一名。

AA準 






© zonepeer.com 2024   |   Privacy Policy