近來大家都怕買市面上無包裝的麵包，都想食得健康，你有無諗過屋企無麵包機，又無廚師機，暫時未係太掌握到自己搓揉的方法，唔知點先算搓出手膜，但又想食到自家製的麵包可以點做?

您估岩啦，今日就同大家分享一款完全唔需要揉的麵包！
解放雙手，實際你真正需要落手落腳做野嘅操作時間可能都係5-10分鐘而已，大部份時間就係等待，咁我當然就係晚上睡眠時靜靜等待，到第2朝起身就開始做動手美味的早午餐啦。
今次我就將麵包放係鑄鐵鍋內烘烤，等佢慢慢上升造出美美嘅外形，仲可以為麵包提香不小呢！

只要4種簡單的食材就可以焗到超有風味的鄉村麵包啦！




材料:

All Purpose Flour高筋麵粉 385 g 
Salt 鹽 1 3/4 teaspoon
Active Dry Yeast活性幹酵母 1/2 teaspoon
Room Temp.Water室溫水 350 ml

你睇到絕對係唔需要任何花哨嘅食材，只需要4種簡單的就可以做出來啦。



水make sure 係室溫水就ok，因為水對酵母有影響架，而酵母我就係用Active Dry Yeast，令麵糰慢慢升發係重點。 

做法: 

1. 首先將麵粉，鹽，活性幹酵母拌混在一起。








2. 將水倒入大碗中，然後用刮刀或木勺將所有材料拌至充分混合。




3. 之後用保鮮紙包實個大碗，然後將麵糰碗放係室溫檯上進行發酵，或放係無加熱嘅焗爐中靜止放12至18個小時，我自己會加上一塊布蓋住。







4. 第2朝起身，可先將焗爐預熱：將烤箱預熱至230度。在預熱時同時將鑄鐵鍋放入焗爐一起加熱，令鑄鐵鍋跟焗爐都達到230度，一定 一定 一定 要用隔熱手套，小心唔好熱燒傷手呀。





呢張圖係麵糰經過15.5小時之後的樣貌，你會見到面上有很多小bubble係好正常的。


同埋麵糰好粘手，所以會要用刮刀幫忙同上手粉。




5. 當開始操作焗爐預熱之後，就可以同時係工作檯同對手撒上麵粉，同樣亦可以係麵糰都撒d麵粉。用手/刮刀輕力將麵糰由個碗入面拎出來，我習慣用刮板將麵糰大約折疊10-12次左右，然後就將麵糰塑形成為圓形，用毛巾蓋住；就等麵糰在檯上靜待至焗爐預熱完成。





6. 之後預備將麵糰球放入已加熱嘅鑄鐵鍋入面。怕粘底可以係鑄鐵鍋底撒d麵粉，亦可以好似我咁加張耐高溫的烘焙紙係鍋底，既可以唔粘底，到時焗完之後亦可以方便拎起，有機會麵包側面會無咁深色，但同樣都係好脆同好美味。
7. 呢個時侯就要先蓋住鑄鐵鍋蓋，連蓋放返入焗爐烘烤30分鐘。然後就拎走鍋蓋再烘烤15至20分鐘 (可以係呢個時候拎起埋張烘焙紙令周邊更上色，亦可不拎的)，直到變成金黃色。
**實際需要視乎每台焗爐，不同的實際溫度同特性來增減時間，不時自行目測再調節**




8. 最後就小心咁由由鍋入面拎出麵包，等佢完全冷卻，將麵包切成薄片，就搞掂啦。



>
(**留意鍋蓋手把，如果係膠就要預先更換好金屬先放入焗爐呀**) 

食個陣我會加上鄉村麵包嘅絕配，就係橄欖油同黑醋啦(最近都改成牛油果加黑醋)，配上這份天然美味，就算留係屋企都可以感受這份到無糖，無油又健康嘅異國風味。




到底咩係免搓麵包？
呢款麵包就係around 10年前，首次係《New York Times》上亮相。 呢種麵包完全唔洗搓揉，基本上就係只要將所有材料都放入碗中，混合起來，靜置時間等酵母完成升發工作，之後烘烤就OK啦。

慢慢咁升發令使麵包更有風味，用鑄鐵鍋去烘烤，可以令麵包有一試難忘嘅脆皮。 

呢種麵包會比較易乾身，所以焗好放涼之後，就要緊緊包好或者放係密封嘅容器入面，以keep得更長時間。我試過放係密封嘅食物盒3至4天，都仲係好好味架。

係唔係超級簡單？ 
呢個食譜超級簡單又好味，近來最少每個月都會係我個廚房中出現一次呢，係我好喜歡嘅其中一款食譜，希望你地都鍾意啦。

孖媽溫馨小提示: 
P.S. 
**室溫下慢慢地令呢款免搓鄉村麵包升發係最重要。 只要時間安排好，我習慣晚上ZzzZ時等酵母經過時間發揮魔力。**
**呢款麵包請記住唔好係麵糰發酵個陣冷藏呀，簡單咁放係室溫的檯上放12-18小時就OK。**
**如果你想知道這款免搓鄉村麵包係唔係已經焗好，只要將麵包由鑄鐵鍋拎出來，要小心熱然後倒出來，用手指敲下麵包底，如果聽起來係空心的，咁就代表OK的啦。**
**值得留意嘅係開始個陣唔好過度攪拌麵糰，只要把所有材料都混合好就可以了，因為佢係唔洗搓揉架。**
**烘烤實際時間需要視乎每台焗爐，不同的實際溫度同特性來增減時間，不時自行目測再調節**
－－－－－－－－－－－－－－－－－－－－－－－－－－－
荔枝孖媽是＊美國NAHA國際芳香治療師 ＊ 嬰兒按摩指導師 ＊ 國家兒童遊戲治療師 ＊ 兒童體適能教練 ＊ 嬰兒瑜伽指導師 ＊兒童早期教育導師＊
一日之間，成為兩子之母！充滿愛與驚喜。曾經致力遊歷世界唔同的地方，到而家變成致力育兒的雙職媽媽。
希望把生活中每一個美好時光都記錄下來。親子育兒，美容扮靚，飲飲食食，購物，好物都想同大家分享! 更希望與大家一起見證孖寶的成長，分享他們生活的大小趣事。
想知更多？可以Follow【荔枝與孖寶】及 荔枝孖媽的個人網誌【按這裡】
Photo: 荔枝與孖寶
Cover Photo: 荔枝與孖寶

---